لو اتكلمنا عن الناس اللي بتحط بصمتها في الكرة المصرية من غير دوشة ولا شو، يبقى لازم نذكر اسم كابتن أحمد سمير بيبو، رئيس قطاع الناشئين بنادي إنبي… واحد من الناس اللي بتشتغل في صمت، وبتبني أجيال بحب وشغف وفهم حقيقي للكرة.
كابتن بيبو مش بس مسؤول قطاع، ده راجل شايل مشروع كبير على كتافه، مشروع اسمه “إنبي المستقبل”.
كابتن / أحمد سمير بيبو
ومن يوم ما مسك القطاع، والأمور ماشية في اتجاه مختلف… تنظيم، تطوير، متابعة دقيقة لكل فريق وكل لاعب، وشغل ممنهج مبني على رؤية واضحة.
قدر في وقت قصير يغير شكل القطاع، ويرجع إنبي واحد من أهم مناجم الكوادر في مصر… وده باين في عدد اللاعبين اللي بيتم تصعيدهم ومن اللي بيمشوا على خطى الكبار.
الميزة الأهم عند كابتن أحمد سمير هي إنه فاهم يعني إيه ناشئ، وعنده خبرة لاعب ومدرب ومسؤول، وبيعرف يتعامل مع الولاد نفسياً وفنيًا، وده سر نجاحه في بناء لاعيب عنده شخصية قبل ما يكون عنده مهارة.
قطاع إنبي في عهده بقى مكان بيخرج مواهب حقيقية… مش مواهب عادية، لكن لعيبة جاهزة للكرة الحديثة، بتفكر، وتنفذ، وتتحمل مسؤولية القميص اللي بتلبسه.
تحية تقدير كبيرة لكابتن أحمد سمير بيبو… راجل بيشتغل على الأرض بصمت، وبيسيب أثر كبير في مستقبل الكرة المصرية
