خلي بالك… عمرك بيتسرق

إبراهيم جمال

فيه سرقة بتحصل حوالينا طول الوقت، بس مش من النوع اللي تلاقيه في قسم الشرطة دي سرقة أخطر وملهاش تعويض السرقة دي هي سرقة العمر
ازاي؟
كل يوم بتصحى تمسك الموبايل بس خمس دقايق تلاقي اليوم كله طار أو تلاقي نفسك بتأجل حاجة ورا حاجة، وتقول ما هو لسه بدري وفجأة تكتشف إن البدري ده بقى ليل والليل بقى اسبوع والاسبوع بقى سنة
الوقت ما بيستناش حد وده اللي بيخليه اغلى حاجة عندك انت ممكن تخسر فلوس وتكسبها تاني، تخسر شغل وتلاقي احسن منه لكن دقيقة راحت من عمرك مش هترجع ابدا
المشكلة اننا ساعات بنضيع وقتنا على حاجات مش فارقة، ومش بس كده احنا اللي بنفتح الباب للسارق يدخل نقعد نتفرج على حاجات ملهاش اي قيمة، ونسوف في القرارات اللي ممكن تغير حياتنا، ونستنى الظروف المناسبة اللي مش هتيجي لو احنا ما صنعناهاش
السر هنا انك تبقى واعي قبل ما تضيع ساعة، اسأل نفسك الساعة دي هتضيف لي ايه !؟
مش لازم تبقى جد طول الوقت، بس خليك عارف انت بتعمل ايه وليه استمتع، اضحك، سافر، اتعلم
المهم ما تسيبش حياتك تمشي وانت مش واخد بالك

احنا مش بنخسر عمرنا فجأة احنا بنخسره بالقطنة يوم ورا يوم ولما تيجي تبص ورا هتلاقي ان الحاجات اللي كنت شايفها مش مستاهلة الوقت هي اللي كانت ممكن تفرق معاك فعلا

الخلاصة: خلي بالك من وقتك عمرك بيتسرق وانت مبتسم.