حسن سعد نصار
هنبدع في التجاهل زي ما أبدعنا في الاهتمام
عارف يعنى إيه تبذل مجهود علشان تهتم بحد
يعني تبقى بتشيل همّه وهو مش حاسس
تفكر فيه أكتر ما بيفكر في نفسه
تحاول تحسّسه إنه مش لوحده ، حتى وانت اللي محتاج اللي يطبطب عليك
تعافر علشان تحافظ عليه
وتعدي عن غلطاته وتعدي عن وجعك بس علشان هو يفضل موجود
بس لما تكتشف إنك كنت لوحدك في المعركة دي
وإنك الوحيد اللي كان شايف العلاقة دي تستاهل
وقتها بس هتعرف تبدع في التجاهل
أيوه .. مش هنهرب ولا نضعف
إحنا هنتجاهل بنفس الإتقان اللي كنا بنهتم بيه
هنتجاهل بكل الرقي اللي كانوا فاكرينه سذاجة
وهنعرفهم يعني إيه لما الشخص اللي بيدي بدون حساب يقرر يقفل الحساب خالص
هنمشي بنفس الهدوء اللي دخلنا بيه حياتهم
بس المرة دي من غير صوت ، من غير مبررات ومن غير دموع
لأن الاهتمام لما يبقى من طرف واحد بيتحول مع الوقت لعبئ
وإحنا مش هنفضل شايلين حاجات مش بتتقدّر
ف من النهاردة لو ما قدروش اهتمامك
ابدع في تجاهلك
واعرف إن التجاهل مش قسوة
ده رد فعل طبيعي لما الطيبة تتقابل ببرود
ولما الحب يترد عليه بجفاء .
سيبهم يدوقوا غيابك ، زى ما كانوا واخدين وجودك كأنه عادي .
ولما يسألوا عليك قول لنفسك بهدوء
أنا دلوقتي ببدع في التجاهل زي ما كنت ببدع في الاهتمام
