بقلم ✍🏻 نهى محمد عيسى
إزيك؟
= ماشية وإنت؟
مش هقدر أقولك إني تمام… أنا واقع بصراحة ويمكن إنتِ آخر واحدة أقدر أواجهها من غير ما أخاف تتحامي عليّ ولو حصل حقك
= شكلك فعلًا مش مظبوط أول مرة أشوفك معترف إن للناس حقوق
إنتِ زي ما إنتِ ما اتغيّرتيش
= لأ اتغيّرت قوي وبقيت أهدى وأنضج وأكتر لحظة حسّيت فيها إني بتصلّح إنك مش موجود
عارف
عارف إنك تعبتِ بسببي وعارف إن جواكي كلام كتير لسه واقفلي
= كنت فاكرة كده كنت فاكرة أول مرة هشوفك فيها هاهتز
مرة أتخيلني هرزع فيك أي حاجة
ومرة أشوفك مع واحدة وأقولها لو بتحبيه بلاش تكرهي نفسك عشانه كنت هناك قبلك وعارفة السكة
ومرات كنت بتهيألي إني أول ما أشوفك هاقوم أحضنك كأني بلمّ نفسي اللي ضاعت
دلوقتي؟
ولا نفسي ألومك
ولا أجرحك
ولا حتى أكرهك
مش علشانك
ده كله علشاني أنا
أنا اللي بقيت فاهمة قيمة مشاعري
ومش ممكن أديها لحد قيمته مش قد الكلام اللي جوايا
الحب اللي كنتي فيه بزيادة كان أكبر منك ومنه
والكره اللي كان ممكن يولع جواه قليل عليه
إنت أقل من إنك تكون قصة أقل من إنك تكون وجع وأقل بكتير من إنك تفضل سؤال
النهارده بس فهمت إن الصدفة مش كانت صدفة
كانت مراجعة نهائية
والنتيجة؟
أنا عدّيت
عدّيتك
وعدّيت كل اللي بينّا
بقيت شايفاك زي حد من الماضي
زي المدرّس اللي كان متأكد إني هقع
والنهارده يشوفني ماشية ثابتة
ف ابتسمله وبعد دقيقة أنسي أصلا إني شفته
أنا فاكراك ؟ آه
بس فاكرة وعدي أكتر
قلتلك هاقوم وهكون بخير ومش هارجع أندم عليك
وقلت ووفيت
إنت بس اللي معرفتش تتحمّل نتيجة اللي عملته
وطلع الندم عليك أنت
على فكرة أنا برضه حد يتندم عليه العمر كله
= ما اختلفناش
كل حد بيأخد اللي على قدّه
وإنت كان حجمك صغير قوي عليّ
أنا كنت زيادة عليك
زيادة من أول يوم
وبرضه آخر يوم أثبتها
*الفراق مشى بينا وساب كل واحد في مكان يليق بيه*
