القسوة والحنية

بقلم الإعلامية د/ولاء العباسي

خيط رفيع جدا جدا جدا بيفرق بين القسوة والحنية وهو ….الكلمة

موضوع في غايه الأهمية لاننا كلنا بنعيشه وعيشناه وهنعيشو

اوقات كتير جدا في كلام عكس بعضه بيفرق جدا ف نفسيتنا وقت الزعل وقت العتاب ف اى وقت عمتا

زى مثلا …..
انا جنبك ….افضل بكتير من معلش

حقك عليا ….. افضل بكتير من انتى السبب وقت الخلاف وسوء التفاهم

ميهونش عليا زعلك …. افضل كتير من انتى اللى بدأتى مش داخلين حرب احنا وبنشوف مين هيطلع كسبان فيها

طول منا عايش مش عاوز اشوف دموعك … افضل بكتير من الكلمه الشهيرة اللى بنسمعها كتير جدا عيطى العياط بيريح

كرامتك من كرامتى…. افضل بكتير من كرامتك مش اغلى من كرامتى بردو احنا مش ف سباق عشان ننتصر ع بعض والله

الدنيا ملهاش طعم وانتى مكشرة … افضل بكتير من مبحبش النكد مع قالبه الوش ياساتر يارب

فين ضحكتك اللى بتنور حياتى …..افضل بكتير من هنفضل ف النكد ده كتير !!؟؟

والله خيط رفيع جدا ياجماعه بيفرق كتير ف مودنا وطاقتنا ويومنا وحياتنا عمتا

الخيط السحرى مابين القسوة والحنية اللى هى الكلمه وتغير مسارها بتغير النفسيه 360درجة

الكلمة ليها قوة بتخلى الحجر يدوب ويلين
ومش بس كدا دى كمان بتقدر تبنى اسوووووار وتهد جبال بردو اه والله ده كلو فرق بسيط
فالكلمه شوفتو ازاى أنها بسيطه جدا وسهله

كلمه تقدر تحى اللى قدامك وبكلمه تقدر تموته وتقضي عليه

كلمه ممكن ترسم بسمه وممكن تنزل دمعه ..

كلمه ممكن تفرق وكلمه ممكن تجمع

نصيحه … ياريت ناخد بالنا من كلامنا وتصرفتنا وافعالنا قلوبنا بقت هشه جدا جدا ونفوسنا وأرواحنا بقت حساسه وضعيفه وبنتلكك علشان نسمع كلمه تجبر بخاطرنا وتحينا

خلينا دايما ماشين بمدأ …
خير الناس انفعهم للناس

دامت قلوبكم وقلوبنا مليئه بالحنان والحب