بقلم / سمر فتحي
أخصائي الصحة النفسية وتعديل السلوك
في لحظة غضب أو عناد شديد من أطفالنا😡، أول شعور بيجينا هو الإحباط، وبنقول في سرنا: “الطفل ده بيتحداني، هو بيعمل كده عشان يغيظني!” لكن في عالم الإرشاد النفسي، الحقيقة أعمق وأكثر حنية من كده بكتير.
الطفل مش قاصد يزعجك، هو ببساطة بيصرخ بـ اللغة الوحيدة اللي يعرفها عشان يقولك: “أنا محتاج حاجة ومش عارف أطلبها.”
الطفل ليس مشكلة، هو رسالة!
في علم النفس، بنؤمن إن كل سلوك صعب من الطفل هو محاولة لتلبية واحدة من أربع حاجات أساسية مفقودة:
هو بيدور على عينيك (لفت الانتباه): لو طفلك حاسس إنك مشغول أو مفيش وقت كافي ليكم سوا، هيبدأ يعمل أي تصرف (حتى لو غلط) عشان يضمن إنك تبص له. هو بيختار الانتباه السلبي، أحسن ما يتجاهل خالص.
عاوز يمسك الخيط (القوة والسيطرة): لما الطفل بيحس إن كل قرار في حياته مش بتاعه (ياكل إيه، يلبس إيه، يعمل إيه)، بيتمسك بأي فرصة عشان يحس إنه مسيطر، وده بيظهر في صورة العند والرفض المطلق.
بيهرب من حِمل تقيل (تجنب الوجع): لو طلبنا منه مهمة صعبة جداً عليه، أو طلبنا منه يعمل حاجة بتسبب له قلق، ممكن يهرب بسلوك يخلينا نسيبه، لأنه مش قادر يقول “أنا خايف أفشل” أو “الموضوع صعب عليّ”.
بيوجع عشان اتوجع (الانتقام): في أوقات قليلة، لو الطفل حاسس بالظلم أو الأذى من حاجة حصلتله، ممكن يعبر عن ألمه ده بسلوك مؤذٍ للآخرين، وكأنه بيقول: “أنا كمان موجوع”.
الاحتواء… هو مفتاح التعديل
تعديل سلوك الطفل مش بيحصل بالصوت العالي أو العقاب اللي بيخوف. التغيير بيبدأ لما تغير طريقتك في النظر إليه.
لما تعرف إن العناد اللي بيعمله هو بحث عن سيطرة، ساعتها هتقدم له خيارات بسيطة بدل ما تدي له أوامر قاطعة. ولما تعرف إن السلوك المزعج ده بحث عن اهتمام، هتبدأ تملأ خزان الاهتمام ده بـ وقت نوعي كامل قبل ما يضطر هو يطلبه بطريقة تزعجك.
رسالتي ليك ❤️:
متخافش من السلوك الصعب✋، خاف إنك تسد طريق التواصل❤️. مهمتك كوالد مش إنك تنتصر على عناد طفلك، مهمتك إنك تكتشف رسالته اللي مش عارف يقولها😔، وتمسك إيده وتساعده يلاقي الكلمات المناسبة. لما بتفهم🤔 بتتغير نظرتك، وبيبدأ السلوك يتعدل لوحده.👌💯
