رمضان فريد
+ بتحكى أم الطفل .. أنا حابة أقولكم على معجزة حصلت مع ابني الصغير (مودي) ببركة مارجرجس الروماني
+ يوم الأثنين كنا رايحين دير مارجرجس الرزيقات وواقفين فى الشارع بنركب العربية وركبت مودي العربية ونزل منها من غير ما أشوفه
+ أتشعبط فى صندوق العربية (ربع نقل اللى فى الصورة) من وراء بتاعت جرجس ابن عم زوجى كان واقف معانا تحت بيتى
+ جرجس أتحرك بالعربية من غير ما ياخد باله ان مودي ماسك في صندوق العربية من ورا ومحدش فينا خد باله أصلا والمرايات مش مبينة انه ماسك فى صندوق العربية لأنه كان ماسك فى نصف الصندوق
+ وبعدين العربية بترجع بضهرها وإحنا مش واخدين بالنا وبندور عليه عشان نركب ونمشي
+ فـجـأة ماثيو ابن عم مودي لقيناه بيقول مودي مودي مودي
+ وإحنا مش فاهمين بيقول كده ليه ؟؟
+ ومرة واحدة لقينا مودي بيقوم من الأرض ويجري عليا وهو بيعيط وبيقول ماما ماما ماما
+ أول ماشوفته فهمت ان العربية خبطته وعدت عليه بقيت اجري واصـ.رخ وأقول ولدي ولدي
+ لغاية مامسكته وخدته فى حضنى مش مصدقة انه كويس
+ وعمه خده من حضنى بالعافية عشان يشوفه متعور ولا متكسر ولا فى إيه بالظبط
+ دي عربية (ربع نقل) عدت عليه ولازم واكيد يكون فيه إصابات وغيره
+ بس الحمدلله نشكر ربنا مكنش فيه خدش واحد
+ مودي قعد مصدوم أكتر من ساعة ومش بينطق ولا كلمة واحدة ومخبي وشه فى صدري من الـ.خضة والـ.خوف
+ وبعدين لما أتكلم وبقى بيلعب قال لباباه مارجرجس يا بابا كان معاه عصاية والحصان بتاعه ولابس طاقية فيها ألوان ولابس إيشارب أحمر مربوط زي بتاع سوبر مان هو اللى شال رأسي كانت هاتدوس عليها العجلة بتاعت العربية
+ حرفيا أنا مش مستوعبة إزاى عربية تعدى عليه وميتعورش حتى تعويرة صغيرة
+ وفهمنا اللى حصل لما واحد من الجيران جابلنا تسجيل الكاميرات بتاعته
نشكر ربنــا وببركة البطل الرومانى مارجرجس اللى كنا رايحين ناخد بركة ديره
ألـف حمد وشكر ليك يارب
ربنا يحافظ على ولادكم بشفاعة ماجرجس الرومانى
شفاعته تكون مع جميعا آمين
