بقلم/ ابراهيم جمال
مشكلتك الحقيقية مش في الواقع،مشكلتك في المخرج الدراما اللي عايش جوا دماغك ومصمم يخلي كل حاجة فيلم رعب.
أنت بتصحى من النوم كتافك تقيلة كأنك كنت شايل جبل مع إنك كنت نايم! بس الحقيقة إنك كنت بتحارب طول الليل في سيناريوهات وهمية عن المستقبل والشغل والفلوس.
الفرق بين الواقع ودماغك كبير أوي الواقع غلبان ومحدود المشكلة بتحصل بتوجع شوية، وبتعدي. إنما دماغك؟ دماغك معندوش فرامل بياخدك من “مشكلة صغيرة” لـ كارثة كونية في ثانيتين. بيخليك تعيش المصيبة ألف مرة في خيالك قبل ما تحصل مرة واحدة في الحقيقة (وده لو حصلت أصلاً)
بتفضل تحرق بنزين أعصابك في خناقات مع ناس مش موجودين، وبترد ردود عبقرية على مواقف عدت عليهاسنين، والنتيجة إنك عايش يا ندمان على امبارح يا مرعوب من بكرة.. والنهاردة بيتحرق في النص.
الحل إنك تشد الفيشة لما تلاقي التروس بدأت تلف، فكر نفسك إن 90% من المخاوف دي “اشتغالات” عقلك بيعملها عشان يقلقك. الواقع أهدى بكتير من الدوشة دي.
انزل من دماغك وعيش اللحظة دي بس اشرب قهوتك، بص للسما، واستنى.
سيب بكرة لرب بكرة، وبلاش تعذب نفسك مرتين مرة بالخيال ومرة بالواقع كفاية مرة واحدة وتدابير ربنا دايمًا بتيجي ألطف مما تتخيل
